فِيلِبِّي

بولَس أَسَّس كَنيسة فيلِبّي فالسْفَر مْتاعو التاني. كانَت هَديك هِيَ الكَنيسة الأولى اللي أسَّسها بولَس في أوروبا. مْدينة فيلِبّي جايّة في شَمال شَرق اليونان، في بْلاد مَقدونية.

بْرِيّة بولَس للمَسيحِيّين مْتاع فيلِبّي تْبَيَّن العَلاقة القْوِيّة اللي كانَت بين بولَس والكَنيسة واللي حَب بولَس يْقَوّيها كْتَر. راهو فالحَبس،  يَتعَدَّب على جال اللي ما يَقدَرش يَخدَم الفيلِبّيين، يْقولَلهُم باللي يْحَبّهُم وباللي راهو مْحَيَّر عليهُم خاطَر ناس واحَدُخرين بَرّحولهُم بالمَسيح بنِيّة ماشي صافية وحَبّو يَدُّغلوهُم. يَتمَنّا بولَس يَبعَتَّلهُم اللي يَخَّدمو معاه باش يَوَّقفو معاهُم ويْجيبولو خْبارهُم. من جيهَتهُم، المَسيحِيّين مْتاع فيلِبّي بَعتو هْديات لبولَس وهُوَ بْعَت يَشكُرهُم، يَنصَحهُم ويْسَجَّعهُم في إيمانهُم.

بولَس يْحط قُدّام عينين الفيلِبّيين حْياة وموت الرَب يَسوع، يَسوع خَلاّ كامَل واش عَندو، وعلى هَدا حَطّو الله فوق كُل شي وكُل واحَد. بولَس تاني خَلاّ الشي اللي كان كاسبو من الدين اللي كان فيه وقْبَل يَتعَدَّب على جال يَسوع المَسيح، راهو فالحَبس واجَد باش يْسَبَّل حْياتو ويْقول للفيلِبّيين يْديرو كيما هُوَ.

\p في كامَل بْرِيّتو، يَحكي بولَس على الفَرحة اللي لْقاها فالإيمان، يْسَجَّع الفيلِبّيين باش يْعيشو في هاد الفَرحة اللي تَبقا في وَقت الشْدايَد والمْحايَن كي يْكونو المَسيحِيّين مَتوَحّدين بيناتهُم ومع الرَب يَسوع.