سْفَر مْتاعو التالَت، حَب بولَس يْروح لروما ويْزيد يْكَمَّل طْريقو للغَرب حَتّى لسْبانيا باش يْبَشَّر بالإنجيل. وباش يْوَجَّد مَرواحو لعَند الرومانِيّين ويْبَيَّن التَعليم مْتاعو للمَسيحِيّين مْتاع تَمّة، سَبَّقَّلهُم هاد البْرِيّة.
هاد البْرِيّة تْلَخَّص مْليح الشي اللي كان بولَس يْبَرَّح بيه: "الله يَستَعرَف بصْلاح بْني آدَم كي يآمنو بيه، وهاد الإيمان يَكفي."
فالفُصول من 1 ل8 هْدَر بولَس على العَلاقة بين طاعة الشَريعة والإيمان بالله بيَسوع المَسيح. الكُترة مْتاع المَسيحِيّين اللي في كَنيسة روما آصَلهُم ماشي يْهود، بَصَّح كانو كاينين بَزّاف من اليْهود في روما وكايَن منهُم اللي وَلاّو مَسيحِيّين وكانو مازالهُم يْطَبّقو فْرايَض الشَريعة اليَهوديّة. والمَسيحِيّين اللي آصَلهُم ماشي يْهود، هومَ تاني لازَمَّلهُم يْطَبّقو الشَريعة؟ هاد الشي حَط الكْنايَس الجْدَد في حيرة كْبيرة. بولَس قال باللي كامَل بْني آدَم خاطيين، اليْهود واللي ماشي يْهود، وحَتّى فَرض من الشَريعة ما يْسَلَّك من الخْطِيّة، بَصَّح الناس يَقَّدرو يَسَّلكو بمْعاونة الروح القُدّوس خاطَر يَسوع المَسيح هُوَ اللي يَدّيهُم لله.
الفُصول من 9 ل 11 يْبَيّنو كيفاش تْكون المْعيشة في كَنيسة يَسوع المَسيح، كيفاش تْكون عِبادة الله والسْلام مع الناس. يْوَصّي بولَس اللي إيمانهُم قْوي باش يَفَّهمو اللي إيمانهُم ضْعيف. الله يْسَلَّك كامَل بْني آدَم من الخْطِيّة والموت ويَقَّدرو يْعيشو مَتوَحّدين بيناتهُم ومَتوَحّدين مع المَسيح بمْعاونة الروح القُدّوس.
فالفَصل 16 يَبعَت بولَس السْلام لناس بَزّاف ويَدكُر آسماوات مْتاع رْجال ونْسا. المَسيحِيّين مْتاع دُرك كي يَقراو هاد البْرِيّة، يْشوفو روحهُم قْراب من المَسيحِيّين مْتاع زْمان.
