العربية الجزائرية

الإنجيل بحسب البشير متى

إنجيل مَتّى نْكتَب للمَسيحِيّين اللي آصَلهُم يْهودي واللي يَعَّرفو مْليح كْتوب العَهَد القْديم. مَتّى يَجبَد بَزّاف هاد الكْتوب ويْوَرّي باللي يَسوع هُوَ اللي يْحَقَّق الشي اللي تْقال فيهُم. كي كْتَب مَتّى هاد الإنجيل، كانو المَسيحِيّين اللي آصَلهُم يْهود تْحاوزو مدْيار الصْلاة تَع اليهود ووَلاّو يَجتَمعو بيناتهُم ويَستَقبلو اللي ماشي يْهود. مَتّى شايَف يَسوع هُوَ السِيَّد اللي يَقدَر يْقول ويامَر بالشي اللي يامَر بيه الله. هاد السِيَّد هُوَ المَسيح اللي كانو اليهود يَستَنّاو فيه وجا يْوَرّي كيفاش لازَم يَنفَهمو فْرايَض العَهَد القْديم. طَم مَتّى كْلام يَسوع في خَمس خُطبات: 1. خُطبة مَعروفة بخُطبة الجْبَل (5-7): دار فيها يَسوع قانون يْعيشو عليه التَلاميد تَعو. هاد القانون يْخُص العَلاقة بين بْنادَم وبْنادَم والعَلاقة بين بْنادَم والله. 2. خُطبة فالفَصل 10: يامَر ويَنصَح اللي يْروحو يْبَشّرو بالإنجيل. 3. خُطبة فالفَصل 13: يَحكي حْكايات باش يْبَيَّن كيفاش تْكون الحالة كي يْكون الله سَلطان. 4. خُطبة فالفَصل 18: يْبَيَّن كيفاش لازَم تْكون العَلاقة بين الخاوة المَسيحِيّين. 5. خُطبة فالفُصول 24 و25: تْقول كيفاش لازَم للتَلاميد يَستَنّاو نُصرة الله الأخرانِيّة. قْبَل وبَعد هاد الخُطبات، كايَن حْكايات يْوَرّيو كيفاش كان يَسوع يَشفي المَرضى، يْوَكَّل الغاشي، يْحكي حْكايات يْْفَطّنو الناس ويْناقَش شْيوخ اليهود. فالبَدية تَع الإنجيل، يَحكي مَتّى كيفاش زاد وكيفاش كْبَر يَسوع؛ فآخَر الإنجيل، سَلطان اليهود يَتَّحكَم عليه بالموت ويَتسَمَّر في صْليب، بَصَّح الله يَحييه مالموت ويَضهَر للتَلاميد تَعو ويَطلَب منهُم يْبَشّرو بالإِنجيل لكامَل شْعوب الأرض. قْبَل ما يْزيد، تْسَمّا يَسوع عَمّانويل، يَعني "الله معانا". إنجيل مَتّى يَخلاص بهاد الوَعد من يَسوع: "وأنا راني معاكُم كُل يوم حَتّى لآخَر الزْمان".