في كْتاب عْمال الرُسُل يْكَمَّل لوقا الحْكاية اللي حْكاها فالإِنجيل مْتاعو. يَحكي كيفاش شَيّعو الرُسل بْشارة الإِنجيل. بْداو قْبَل في أورشَليم، وزادو فالمْدارب اللي قُدّامها، أومبَعد بَلدان البْحَر البْيَض المَتوَسَّط، وهَكدا دارو الخَدمة اللي كَلَّفهُم بيها يَسوع.
فالبَدية مْتاع الكْتاب، يَسوع طْلَع للسْما عَند الله. دُرك ما راهوش حاضَر كيما كان، بَصَّح بْعَت للرُسُل من عَند الله الروح القُدّوس.
حَتّى للفَصل 12، وبُطرُس هُوَ اللي بايَن كْتَر في حْكاية الكْتاب. تابعين يَسوع يْهود، ما زالهُم يْروحو لمَعبَد أورشَليم يَهَّدرو على سيدهُم، ورِيّاس الدين يْوَعّصولهُم كيما كانو يْديرو ليَسوع. المومنين يْروحو لكُل مْكان فاليَهودِيّة، فالسامرة والبَلدان الأُخرين. في داك الوَقت، غير اليْهود اللي كانو يَعَّرفو الله الواحَد وكانو حاسبين باللي الأخرين ما يَقَّدروش يَعَّرفوه. بَصَّح يَسوع يَسمَح لكامَل الناس باش يْكونو في عَلاقة مع الله، والرُسُل مْتاعو يْديرو شي جْديد: يْبَشّرو اللي آصَلهُم ماشي يْهود. كْنايَس جْدَد بْداو يَخُّرجو، المومنين غير يْزيدو وفيهُم اللي آصلو يْهودي واللي آصلو ماشي يْهودي.
فالفَصل 13، يْبان الرَسول بولَس. تْجيه دَعوة من عَند يَسوع المَسيح وكَنيسة أَنطاكية في سوريا تْخَيّرو باش يْروح بْعيد يْبَشَّر بإِنجيل المَسيح.
الفُصول الباقيين يَحكيو على السْفَر مْتاعو وكيفاش وَصَّل الإِنجيل لبَلدان البْحَر البْيَض المَتوَسَّط وحَتّى لروما عاصمة الإِمبراطورِيّة.
إِنجيل لوقا يَحكي على وَقت يَسوع، وفي كْتاب عْمال الرُسُل يَبدا وَقت الكَنيسة. هَدا هُوَ الوَقت وين المومنين المَسيحِيّين يْبَشّرو دايمًا وفي كُل مْكان بيَسوع المَسيح. يَهَّدرو عليه للناس من كُل جَنس وكُل دين، للكْبار والصْغار، للقاريين واللي ماشي قاريين، للمْرَفّهين والڤْلالين.
